Va mangiastu mai a granita al limuni ra navi traghettu, candu iati o viniti i Missina …cu ddhu caddu chi vi caccia ravanti? Mamma mia…è comu a na manu santa chi vi caccia a strura! Certu…sempri se unu non penza a nenti e non si faci domandi…!
Cu stu caddhu i lugliu a pinzava …aiva bbisognu mi mi rinfriscu a bbucca e cusì truvaia sta rigetta ru sorbettu a limoni chi è veloci e senza machina ru gelatu.Insomma chiddhu chi ‘nci voli mi ‘ndi ripigghiamu mmostru.
Difficoltà: pì ssitati e cà strura .
Tempu : nu quartu r’ura chiù o menu (15-20 minuti).
L’attrezzatura: pi fari stu sorbettu aviti bisognu sulu i nu bbonu frullatori.
Ingredienti: 2 belli limuni biologichi e senza porcherii, 250 gr i zucchiru, 700 gr i ghiacciu, nu iancu i ll’ovu (1 albume).
All’opira:
Lavati i limuni belli belli , rattati a scorcia (grattuggiatene la buccia) e sarbatila.
Mundati i limuni e cacciatinci tutta a piddhicchia ianca (pulite gli spicchi dalla pellicina bianca che è amara),tagghiatili a pezzi e mintitili ntò frullatori cu zucchuru e cu iancu i ll’ovu. Frullati tuttu cosi pi na para i minuti e poi ggiungiti manu a manu u ghiacciu…npocu a vota, finu a chi no mintiti tuttu.
Forsi non vi sembra veru…ma u vostru sorbettu al limoni è prontu!
Ora pi fari i splendidi mintitulu nta nu bellu biccheri, supra ‘bci mintiti a scorcia rattata ru limuni e se vuliti puru ‘ncacchi pezzu i fraula (a’ so morti!).
Se vi pari chi vinni liquitu u putiti mintiri mpocu nto congelatori.
Se anbeci non bi serbi sobboto e u vuliti sarbari (…puru pirchì chiddhu chi nisciu mbasta pi na recina i cristiani!)u putiti tiniri nto congelatori ,però ricurdativi mu ggirati ropu na para r’uri.
Ora si chi vi passa a strura!
Zia Fujiko
