A pasta alla Norma, ovvero cu sugu e ca mulingiana fritta, a canusciti tutti: è forsi unu ri piatti chù bboni del globbo terracqueo…però ddha mulingiana fritta…i stati …mmostru pa linea,mmostru pu brusciuri i stomucu…non tutti sa ponnu mangiari.
E siccomu ieu sugnu na benefattoressa…sturiaia ma fazzu lait…cioè ca mulingiana rrustuta: criritimi non c’a mmanca nenti!
Difficoltà: pi tutti chiddi chi ncia squagghia u cori candu virunu a mulingiana fritta…ma non ndi ponnu mangiari..
Tempo: a solita menz’ura…
Porzioni: 4 pirsoni lait o dui mangiatari
Ingredienti: na bella mulingiana (1 melenzana violetta), na scatula i pilati ( 400 gr di pomodori pelati), menza cipuddha, 2 fogghi i bascilicò (basilico),Sali, pipi bruscienti (peperoncino), 2 cucchiari r’ogghiu, rriniu (origano), parmiggianu a volontà.
All’opira:
Lavati a mulingiana e tagghiatila a dadini. Faciti ‘nfucari na piastra , rrustitili belli belli e mintitili i parti.
Non va spirditi l’acqua pa pasta!
Nta pareddha mintiti l’ogghiu, a cipuddha tagghiata fina e ropu na para i minuti ggiungiti a pilata ( i pomodori pelati) e giriati bbonu. Ropu 5 minuti, scacciati i pilati cu na furchetta, ggiustati i Sali, mintiti u pipi bruscienti, u rriniu : u sintiti u sciauru? Ncia mmanca a parola!
Faciti cociri u zucu pi nu quartu r’ura.
A stu puntu è quasi prontu: mintiti a mulingiana , i fogghi i bascilicò tagghiati fini e girati tuttu cosi, mi si ncorpurunu belli belli.
Faciti cociri ancora na para i minuti e stutati.
Sculati a pasta e ittatila nda pareddha, girati e rigirati e sponziati (spargete) cu na mangiata i parmiggianu.
A Norma lait è pronta… bonappitittu!
Zia Fujiko