Amici cari, amanti ra capunata, puristi ra cutuletta, estimatori ru pipi chinu… voi tutti inzomma…non fussiate privinuti confrontamente a questa malarigetta…. U sacciu, u sacciu chi u frittu è l’apostrofo rosa ntra le parole “pipi chinu”… namperò… ora chi è stati, pinzati puru a cui a pipironata llava fari…. non zulu e vostri panzi i canigghia!
E siccomu ieu sugnu sugnu fimmina i cori… sturiaia mu modu mi mentu paci nte famigghi, tra u maritu chi voli… e a mugghieri chi faci… e cusì eccu a vui
a Pipironata lait… ovveru o furnu
chi faci bbeni a maritu e a mugghieri!
Difficoltà: nuddha… sulu mpocu i pacenza.
Tempu: na urata i furnu …. mi raccumandu ma faciti ropu ri setti… o a sira (è chiù bbona u iornu ropu!) pirchì ora cu sta tariffa nova… comu si chiama… bioraria… a currenti custa menu cu tardu (… non sannu cchiù comu ‘ndanna rrubbari i sordi!).
Porzioni: se pi contornu… allura basta pi 4 cristiani…. ma se a vuliti pi piattu unicu… macari mi cunzati panini, basta pi 2.
Ingredienti: 2 belli pipi (peperoni), 1 mulingiana (melenzana), 1 cucuzzaddha (zucchina), 4 patati , menza cipuddha russa, na bella pumaroru fatta (matura), ogghiu e sali.
All’opira:
Tagghiati a mulingiana a spicchi e cocciatila ( mettetela sotto sale in una ciotola con un peso per mezz’oretta, per fargli perdere l’acqua di vegetazione).Passatu u tempu, sciacquatila bbona e stringitilafitta fitta. (strizzatela bene).
Tagghiati tutta a robba , a parti a pumaroru, e facitili a spicchi picculi, cusì.
Ddhumati u furnu a 250° e nta na teglia mintiti du cucchiari r’ogghiu e i pipi, cù ncocciu i sali.
Nfurnatili pi nu quartu r’ura, mi si ncottarisciunu mpocu. N’to mentri nta na suppera mbischiati tutti lautri ortaggi, compresa a pumaroru fatta a pezza, du cucchiari r’ogghiu e u sali.
Passatu u quartu r’ura , ggiungiti sti cosi e pipi nto furnu e faciti cociri pi nu quartu r’ura ancora a 250°, poi mbasciati a 200° e finiti a cottura (nautri 30 minuti).
Facitila riffriddari bbona… anzi se a faciti avanzitempu è megghiu!
A pipironata lait è pronta!
U sintiti u sciauru? Rroba da porto d’armi! E chi culuri!… non avi nenti i menu i chiddha fritta… anzi si…. i calurii!
Bonappitittu!
