Bentruati a tutti l’amici vicini e luntani. Comu iamu? A ‘nfurenza vi pigghiau o va scampastu?Ma u sintiti stu friddu? Sarà a vecchiaia, sarà a tramuntana, sarà chiddhu chi vuliti ma ieu stu friddu non mu ricordu mai llautri anni!!!!!
Oggi vi rugnu a rigetta i na marmellata assai curiusa fatta ca cucuzza i porcu! U sacciu , accamora stati pinzandu…”Ca cucuzza i porcu????Na marmellata????Ma zia u friddu ti minau nta cucina!”….puru ieu candu liggia a rigetta pinzaia a mali, mi rizzaru i carni sulu mi penzu a cucuzza inziemi o zucchuru, ddha cucchiati nta na tiella!…eppuru mippa ricririri…pirchì è propria bbona e poi dhu piccantinu nci sta propriu a pinnellu! Ora vi rugnu a rigetta….
MARMELLATA I CUCUZZA PICCANTINA
Ingredienti: nu chilu i cucuzza i porcu già pulizzata, 20gr i zenzulu (zenzero in polvere), 2 limuni, 750gr i zucchuru, nu biccheri r’acqua.
Allura, tagghiamu a cucuzza a pezzi e a mintimu nto furnu pi menzurata, a 180°.
Candu è beddha rimuddhata a mintimu nta na suppera c’ù zinzulu, u zzucu e a scorcia rattataru limuni . Intantu mintimu u zucchuru e l’acqua nta na tiella e facimu nu sciroppu, u facimu bugghiri cantu mi si sciogghi u zucchuru e poi nci ggiungimu a cucuzza e u restu.
Facimu bugghiri tuttu cosi pi n’ura, girandu e schiumandu ogni tantu. Candu a marmellata è cotta a mintimu nte buccaccedhi, chiurimu ermetichi e i mintimu suttasupra ma rifriddunu.
E’ bona chi pari i rangi, sia spalmata nto pani chi nta na bella crostata o aundi vi piaci….puru cu furmaggiu !
Boni cosi e bonappitittu!
zia Fujiko
