Scusatimi a licenza poetica, suggeritami tra l’altro dall’amico, nonchè filosufu e liberu pinzaturi, Giuanni ….si, pirchì patunu propriu chiddhi chi vi ccattati o supermercatu cu na certa marca chi ncumincia pi Mister e finisci pi Day….quindi ‘Mpari Iornu!
Comunquementi, candu vitti sta rigetta mindi nnamuraia e puru i me figghi, nonpirultima chiddha chi campa r’aria…! Ormai u sapiti chi a mia mi piaci mi va mmustru chi chiddhu chi ccattamu bellu e fattu (e chinu di pirchirii chimichi…) u putimu fari a casa! Certu nci voli pacenzia e tempu, certu non venunu belli comu a chiddhi ccattati ….ma vuliti mintiri u sapuri, u sciauru e soprattuttu a genuinità!
Iamu a nui:
CIAMBELLINI ‘MPARI IORNU ( liberamente ispirate a una ricetta di Nightfairy)
Ingredienti: (pi 24 ciambellini) 200gr i burru o margarina, 125gr i fecula i patati, 125gr i farina, menza bustina i levitu, 4 ova, na bustina i vanillina, 150 gr i zucchuru.
All’opira:
Lavurati u burru ammorbiditu cu zucchiru, iutanduvi cu nostru amicu frullinu…Poi candu ddivintau na crema, ggiungiti l’ova a unu a vota cuntunuandu a frullari.
Miscelati bbonu nta na suppera a fecula,a farina, u levitu e a vanillina e i ggiungiti a cucchiarati o mpastu, sempri frullandu.
Ora mintiti u mpastu nte formini pi ciambellina ( chiddhi i siliconi senza nenti, chiddhi antinderenti è megghiu mi mburrati mmostru!). Pi mintiri u mpastu usati a sacca ru pasticceri…oppuru putiti fari comu a mia: pigghiati na busta i chiddhi pi congelari, mintiti u mpastu e u spingiti tuttu nda ‘n angulu, poi ca forbici tagghiati pocu a punti i l’anguleddhu e cusì vualà a sacca a posc…ahahahah! In più candu finiti non lliti mmancu lavari e ittati tuttu cosi! Mintiti pocu mpastu pirchi unchia assai!
Nfurnati a 180° pi deci minuti. Mi raccumandu mi faciti rifriddari prima mi cacciati ra furmina, chi sennò sa rumpunu se sù caddi!
Ieu i fici puru al cacau, mbasta mi ggiungiti na cucchiara scarsa i cacau nto mpastu iancu!
Spurbiratili i zucchuru a velu e faciti a merenda, pi vui e pi chiddhi a cui nci vuliti bbeni!
A’ prossima
zia Fujiko
