E dopu l’antipasti iamu o primu ru nostru cenoni i Natali. Comu primu piattu pu iornu i Natali, u iornu ra famigghia riunita, non putimu fari na pasta qualunqui chi cattamu nta ddhu paccuceddhu blu o virdi e chi veni i nautru mundu! No, non putimu calari ncocciu i pasta fatta nta na fabbrica rammunti…oggi no.
Oggi è nu iornu speciali u quindi imu a fari na pasta speciali: a pasta i casa!
RAVIOLI RA ME’ CASA
Ingredienti pa pasta: 3 ova frischi, 300gr i farina00, nu pizzicu i sali.
pu ripienu: 300gr i spinaci bugghiuti e sculati bboni, 130gr i ricotta, nu pugnu i furmaggiu parmiggianu, nu russu r’ovu, sali e nuci muschiata.
Mintiti a farina a funtana supra o taulu e nto menzu faciti nu bucu e nci mintiti l’ova e u sali.
Mpastati bbonu, prima cu na furchetta e poi chi mani, finu a chi non ddiventa na bella paddha liscia e duraceddha.
Faciti ripusari a pasta pi na urata, ncuddhuriata cu cellofanni e intantu apposta mi vi ripusati, priparati u ripienu: frullati i spinaci e ggiungitinci a ricotta, u furmaggiu, u russu r’ovu, u sali e a nuci muschiata e mbischiati bbonu.
Poi pigghiati a pasta e a stinditi bbona cu mattarellu, fina fina e cu na cucchiarina pigghiati u ripienu e u mintiti supra a sfoglia a mostraceddhi distanziati. Poi i cumbugghiati cu ll’autra sfoglia e ca furma fatta apposta tagghiati i ravioli, o se non llaiti i putiti tagghiari cu na rotellina dentata….
Vi ricordu chi a pasta i casa si coci viatu, quindi cucitila pi na recina i minuti e cunditila cu nu sugu a vostru piaciri. A mia mi piaci cu sugu ca pumaroru frisca pilata e passata nta pareddha cu ogghiu e cipuddha o puru cu burru e ca salvia…pirchì nu zzucu troppu pisanti cumbogghia u sapuri ru ripienu.
Certu a vostra zia a pasta a faci nte festi, ma c’è nu postu aundi a pasta frisca a fannu tutti i iorna…e da professionisti. Se a vuliti ssaggiari ccomudativi!
Bonappitittu e a prossima settimana cu sicundu piattu ru nostru pranzu ri festi!
zia Fujiko
