Bonasira e bentruvati. A sintistu chi bella botta r’acqua chi fici stanotti? Pariva mbernu fundu!… e chi trona! Mancu nta l’isuli tropicali i sintia mai cusì forti!
Oggi vi rugnu nautra bella rigetta ca mulingiana: bbona, sciaurusa e soprattuttu fridda, friddissima ru frigurificu! Puru chista faci parti ru nostru tesoru culinariu suddulu.
Puru se si chiama Mulingiana a pruppu, non ava nnenti a chi fari cu nostru amicu marittimu… infattamenti si tratta di mulingiana scaddata e cunzata, chi si poti mangiari comu contornu, comu antipastu o comu sicundu liggeru, pirchì è frisca comu a na nzalata i pumaroru.
Ingredienti: 4 mulingiani, agghiu, ogghiu, rriniu, citu, sali e bascilicò (o menta se ll’aiti).
Mundati i mulingiani e cu nu cuteddhu tagghiatili pi tri quarti i longu e i chiattu cusì, mi restunu sani i nu latu.
Mintiti a bugghiri l’acqua nta nu tianu, salatila e mintiti i mulingiani cu nu cumbogghiu.
Ogni tantu mentri bugghiunu mbasciatili cu na furchetta e dopu nu quartu r’ura (pruatili ca furchetta, hanna ssiri moddhi ma no spatti) chiuriti u focu e sculatili.
Facitili riffriddari e poi i sprimiti belli belli, mi iettunu tutta l’acqua.
Ora i putiti cunzari: sali, rriniu, agghiu , bascilicò , citu bellu abbondanti ( de gustibus) e ogghiu.
U sintiti chi sciauru?… uonderful!
Mintitili nto frigurificu pi na para r’uri e poi vi putiti mangiari.
Rifriscativi a bbucca a me saluti
Rigetta in itagliano:
Melenzane fredde all’aceto
Ingredienti: 4 melenzane, aceto, sale, aglio, origano, basilico e menta, olio EVO.
Esecuzione:
Pulite le melanzane, privandole della buccia viola. Praticate in ognuna dei tagli orizzontali e verticali, incrociati, per tre quarti della lunghezza, in modo che la melanzana risulti a tocchetti ma ogni tocchetto rimanga attaccato alla base.
Mettetele a bollire in acqua salata per un quarto d’ora circa, comunque finchè inforchettandole risultino morbide ma non troppo.
Scolatele dall’acqua e fatele raffreddare, quindi strizzatele con le mani, per eliminare l’acqua in eccesso ( premendo una mano contro l’altra).
Conditele con sale, origano, basilico, aglio, aceto abbondante ( a me piace così!) e olio e conservatele in frigo per un paio d’ore.